Бројот на жртвите во срушената зграда во близина на Мајами, Флорида, се искачи на 11, бидејќи уште едно тело беше извлечено од урнатините, а операцијата за спасување продолжува, јави Гласот на Америка.

Локалните власти соопштија дека 151 лице сè уште се води како исчезнато.

Спасувачките екипи веќе пет дена ги пребаруваат урнатините на зградата во градот Сурфајд, и покрај лошите временски услови и помалите пожари.

Постојат шест до осум екипи на теренот кои бараат знаци на живот.

Причината за уривањето сè уште не е позната.

Градот Сурфајд објави документи од 2018 година, во кои се проценува дека ќе бидат потребни повеќе од девет милиони долари за решавање на проблемите презентирани во извештајот од истата година.Во тој извештај, инженерите откриле значителна структурна штета околу базенот во зградата и влошување на цементот во подземната гаража. Американските медиуми јавуваат дека еден месец по објавувањето на извештајот, градскиот службеник ги уверил станарите дека зградата е „во многу добра состојба“.