Со билатерални средби на претседателот Стево Пендаровски со косовската претседателка Вјоса Османи и со претседателот на Албанија Бајрам Бегај пред официјалниот почеток започна лидерскиот состанок на Процесот Брдо-Бриони во Скопје.

На состанокот учествуваат претседателот на Република Хрватска, Зоран Милановиќ и претседателката на Република Словенија, Наташа Пирц Мусар, во улога на ко-домаќини, како и претседателот на Република Србија, Александар Вучиќ, претседателката на Република Косово, Вјоса Османи Садриу, претседателот на Република Албанија, Бајрам Бегај, претседателот на Црна Гора, Јаков Милатовиќ и членовите на претседателството на Босна и Херцеговина: Жељко Комшиќ, Денис Беќировиќ и Жељка Цвијановиќ.

Во фокусот на годинешниот состанок на лидерите на земјите учеснички од Процесот Брдо-Бриони во Скопје, според најавите, се европските интеграции, климатските промени и иселувањето на младите.

Хрватскиот претседател Зоран Милановиќ пред состанокот рече дека се надева оти оваа средба во Скопје нема да заврши како претходните две во „кавга меѓу раштимани инструменти“ и кршење копја при усвојувањето на завршна декларација.

На ланскиот состанок конечната декларација не беше усвоена бидејќи хрватскиот претседател побара во документот да се спомене уставот на трите народи во Босна и Херцеговина, што не беше договорено од двајца членови на босанското претседателство.

Една година претходно, пак, учесниците прифатија само компромисен текст на завршната декларација поради расправиите меѓу косовската претседателка Вјоса Османи и српскиот лидер Александар Вучиќ.