Основачот и сопственик на платформата за видеа „Рамбл“, канадско-американскиот бизнисмен со македонско потекло Крис Павловски, во интервју за „Телма“ вели дека тој и неговата компанија не го организирале патувањето на македонската владина делегација во САД за време на инаугурацијата на претседателот Доналд Трамп во јануари.

Павлоски, кој во земјава учествува на самитот на иницијативата „Македонија 2025“, на прашањето дали го финансирал патувањето на македонската државна делегација во Америка, одговори:

„Со почит кон македонската влада, ние не го организиравме патувањето во Вашингтон. Тоа не е нешто со што ние се занимаваме, ние водиме видеоплатформа и пренесување стримови и видеа. Ние не сме политичка компанија, не учествуваме таму. Ние сме видеоплатформа.“

Крис Павловски важи за близок до претседателот на САД Доналд Трамп. Компанијата „Рамбл“ пред неколку месеци отвори свое претставништво во Македонија.