Битолското обвинителство сега има Истражен центар
Основното јавно обвинителство Битола доби нов истражен центар кој треба значително да ги зајакне истражните капацитети на обвинителството.
Препорачано
„Во последниот период, ОЈО Битола работеше на повеќе тешки и сложени предмети особено од областа на економскиот и финансискиот криминал и сомнителни јавни набавки. Новоформираниот истражен центар треба дополнително да ги зајакне капацитетите за истражување најмногу на овие, но и на други кривични дела”, рече државниот обвинител Љупчо Коцевски, кој го означи стартот на работата на истражниот центар.
Ова е петтиот по ред истражен центар формиран во Јавното обвинителство согласно член 45 од Законот за кривична постапка. Вакви истражни центри веќе функционираат во обвинителствата во Скопје, Тетово, Куманово и во ОЈОГОКК, а државниот јавен обвинител ги истакна нивните досегашни резултати.
„Во истражниот центар на Основното јавно обвинителство за гонење на организиран криминал и корупција во моментов се ангажирани над 20 истражители. Благодарение на донациите од нашите странски партнери, пред се од американската амбасада и од Европската унија кои се и денеска тука со нас, тој истражен центар има една од најсовремените лаборатории за дигитална форензика во регионот и опремен центар за аналитика“, рече Коцевски.
