Фудбалската федерација на Македонија (ФФМ) потврди дека УЕФА дала одобрение стадионот „Петар Милошевски“ во Битола да биде домаќин на квалификацискиот натпревар меѓу младинските селекции на Македонија и Италија (до 21 година), кој ќе се одигра на 9 септември во рамките на квалификациите за Европското првенство.

Стадионот, кој во изминатите 40-тина дена беше подложен на обемна реконструкција, сега ги исполнува стандардите на УЕФА. Поставени се нови столчиња на јужната трибина, целосно обновена е тартан патеката, опремени се службените простории, медија-зоната, како и ВИП-сегментот, а се набавени и нови клупи за резервни фудбалери. Како дел од донацијата на ФФМ, стадионот доби и современ ЛЕД семафор, а поставен е и нов тревник.

Инвестицијата изнесувала околу 150.000 евра, а поради работите, на претходното коло Пелистер беше принуден да игра во Кавадарци.

„Ова е пример како со заедничка работа може да се постигне многу. Благодарност до градоначалникот Тони Коњановски и неговиот тим – за кратко време го доведовме стадионот до ниво што доби потврда и од УЕФА,“ изјави претседателот на ФФМ, Масар Омерагиќ.

Тој додаде дека следен чекор во плановите на Федерацијата е реконструкција на градскиот стадион во Тетово, како дел од пошироката стратегија за подобрување на фудбалската инфраструктура низ државата.