Издавачката куќа „Аз-Буки“, како 76. книга во библиотеката „Филозофија“, ја објави книгата „Compendium philosophiae“ од професорот по филозофија и научен истражувач д-р Бошко Караџов. Тој е автор на студијата „Парадоксите на индуктивната логика“ (Аз-Буки, 2020), како и на над 50-ина научно-филозофски текстови објавени во домашни и меѓународни филозофски и научни списанија.

Книгата „Compendium philosophiae“ е збирка на филозофски есеи, научно-популарни статии, научни огледи, расправи и други критички текстови од областа на филозофија на политиката, филозофија на јазикот, филозофија на културата и идентитетските теории.

Книгата е поделена во три дела. Во првиот дел со наслов „Онтологија на слободата“ се поместени есеи и огледи од областа на политичката филозофија кои говорат за вредноста на слободата низ призмата на анархо-пацифистичката филозофија, либертаријанската идеологија, марксистичката антропологија и монархизмот. Вториот дел е насловен „Филозофијата и јазикот“ и во него се приопштени критички текстови од областа на филозофијата на јазикот и јазикот на филозофијата. Третиот дел носи наслов „Идентитет, предание и паганска политика“ и во него се вклучени научни расправи и анализи за македонското национално прашање, македонските културни политики и идентитетски стратегии.

(Текстот е објавен во „Културен печат“ број 77, во печатеното издание на „Слободен печат“ на 17-18 април 2021)