Беретини поуспешен од демотивираниот Тим
Италијанецот Матео Беретини во третиот меч дојде до првата победа во дебитантскиот настап на завршниот Мастерс турнир во Лондон откако го совлада Доминик Тим во два сета со 7:6,6:3.
Овој натпревар немаше никаква натпреварувачка важност бидејќи Беретини ги загуби два дуела, додека Тим со победите над Роже Федерер и Новак Ѓоковиќ, веќе си обезбеди пласман во полуфиналето и тоа како првопласиран во групата Бјорн Борг.
Во таква ситуација, се чини дека поголема желба за победа имаше Италијанецот и сосема заслужено дојде до победата. Во првиот сет, Беретини при 5:4 сервираше за сет, но дозволи Тим да направи брејк и дуелот да го однесе во тајбрејкот. Во него, Италијанецот поведе со 4:0 и рутински дојде до 7:3 за водство од 1:0 во сетови.
Во вториот сет, Беретини прв дојде до брејк во шестиот гем (4:2) и предноста ја задржа до крајот на сетот кој го доби со 6:3.
Вечерва од 21 часот во вториот натпревар ќе играат Ѓоковиќ и Федерер и победникот ќе биде вториот полуфиналист од групата Бјорн Борг.