Барселона ги мерка Левандовски и Салах
Управата на Барселона планира да го активира планот Б во летниот преоден рок откако се поизвесно е дека Ерлинг Халанд ќе потпише за Манчестер сити.
Каталонскиот весник „Мундо Депортиво“ пишува дека Барселона на лето ќе се обиде да дојде до потписот на Роберт Левандовски од Баерн Минхен или на Мохамед Салах од Ливерпул.
Медиумите денеска објавија дека првата средба на Салах и претставниците на Ливерпул не била успешна, фудбалерот ја одбил понудата за продолжување на договорот и тоа сака да го искористи Барселона и да го намами египетскиот репрезентативец да потпише за каталонскиот тим.
Претседателот на Барселона, Жоан Лапорта во Салах го гледа идеалниот наследник на Лионел Меси и смета дека египетскиот репрезентативец би можел уште 4-5 сезони да игра на врвно ниво и да ја предводи Барселона во враќањето кон европскиот врв.
Договорот на Салах со Ливерпул истекува идната година, но „Мундо депортиво“ пишува дека шансите за трансфер се минимални бидејќи фудбалерот сака да потпише нов договор со „црвените“ и го користи интересот на Барселона за да ги добие посакуваните 500.000 евра неделна плата.
Втората и пореална опција е Роберт Левандовски од Баерн Минхен на кого договорот му истекува идното лето и доколку не потпише нов договор, баварскиот тим планира на лето да го продаде за да заработи нешто. Желбата на Левандовски е да го облече дресот на Реал Мадрид, но со ангажманот на Килијан Мбапе, оваа опција пропаѓа и тоа сака да го искористи Барселона.