Кошаркарот на МЗТ Скопје Аеродром и македонски репрезентативец, Андреј Магдевски беше успешно опериран по тешката повреда на коленото, добиена на неодамнешниот домашен меч против Тиквеш.

Тој се повреди при еден од карактеристичните пробиви кон противничкиот кош, по што по низа лекарски консултации беше решено дека е неопходен оперативен зафат.

Плејмејкерот беше опериран од доктор Михајло Ивановски, специјалист по трауматологија во болницата „Аџибадем Систина“, која со години наназад е голем пријател на КК МЗТ Скопје Аеродром и место каде што ги „лечи раните“ по тешките битки на домашна и меѓународна сцена.

– Големо благодарам за докторот и за целиот персонал на нашиот партнер на полето на здравството, со надеж дека нивните услуги во иднина ќе ни требаат сѐ поретко. На Андреј, пак, му посакуваме успешно постоперативно опоравување, а потоа и успешна рехабилитација, со надеж дека во рекорден рок ќе го видиме назад на кошаркарскиот терен – стои во објавата на клубот.