Андоновиќ: Расните немири во САД прераснуваат во социјален бунт (ВИДЕО)

Вашингтон, САД / 31 мај 2020 / Фото: EPA-EFE/SHAWN THEW 

Шеста ноќ по ред траат протестите поради бруталното убиство на афроамериканецот Џорџ Флојд од страна на полицијата во Минеаполис.

Страстите дополнително се подигнаа откако резултатите од обдукцијата покажале дека Флојд, починал од задушување поради притисок врз неговиот грб и вратот од полицаецот Дерек Шовин, кој неколку минути клечел врз неговиот врат и ги игнорирал неговите повици за помош, изјавија адвокатите на семејството.

Лекарите кои ја извршиле обдукција соопштија дека станува збор за брутално убиство.Еден од докторите кои ја извршиле обдукцијата, на прес конференција, изјави дека Флојд претходно немал здравствени проблеми што би придонесло за неговата смрт. Адвокатот на семејството на убиениот Афроамерикенец Џорџ Флојд, изјави дека има доволно докази да се потврди дека обвинетиот полицаец Дерек Шовин постапил и го убил со умисла.

Во меѓувреме, во немирите во 140 градови во САД досега се уапсени над 4.400 демонстранти. Прогласена е вонредна состојба во 40 американски градови, а претседателот Трамп најави дека ќе испрати војска на улиците на американските градови за да им стави крај на насилствата. Тој ги критикуваше градските и властите на неколку сојузни држави дека не успеале да ги исконтролираат протестите и да ги одбранат своите граѓани.

Се очекува Трамп да се повика на законот за Бунт од 1807 година, со кој претседателот има право да го задуши беззаконието со употреба на армијата на САД. Тој закон последен пат е употребен во 1992 година од тогашниот претседател за сузбивање на немирите во Лос Анѓелес, кога поротата ги ослободи четворицата полицајци кои го претепаа Родни Кинг, по што избувнаа масовните насилства на улиците низ градот.

Сепак дел од генералите на Пентагон засега се спротиставуваат на одлуката на Трамп, сметајки дека војската не смее да се меша во овие насилства.

Особено што според дел од американската јавност се работи за социјален бунт како резултат на политиките кои изминативе четири години ги води администрацијата на Трамп. Веќе е јасно дека расниот прерасна во социјален бунт на американците, како резултат на долгогодишните класни разлики меѓу Американците.

Бидејќи протестите се случуваат во екот на кампањата во пресрет на американските претседателски избори закажани за 3 ноември, не се исклучува протестите да прераснат во обид за пуч против Трамп. Опозиционите демократи и кандидатотот Џо Бајден се надеваат дека преку овие протести, нестабилноста и намалениот рејтинг на Трамп полесно ќе се вратат на власт.

 

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот