Американските власти го отстранија мистериозниот монолит кој се појави на планинскиот венец во близина на Лас Вегас. Се уште не се знае кој и зошто го ставил таму.

„Засега не е познато како предметот стигнал до локацијата или кој е одговорен за тоа“, соопшти во петокот полицијата во Лас Вегас.

Монолитот е висок речиси два метра, а минатиот викенд тој беше откриен во пустината Невада. Предметот беше забележан од полицијата во Лас Вегас за време на мисија за пребарување и спасување северно од долината Лас Вегас, пишува Си-Ен-Ен.

Монолитот наликува на други слични мистериозни објекти кои се појавија низ светот во 2020 година. Исто така, има сличности со оној од култниот научно-фантастичен филм од 2001: Одисеја во вселената, во режија на Стенли Кјубрик.

Пред околу четири години, слични предмети се појавија на различни места, вклучително и еден во американската пустина Јута. Во ноември 2020 година, тој беше забележан од пилот на хеликоптер. Отприлика во исто време, еден бил пронајден во Романија, како и еден во Калифорнија и на островот Вајт во Англија.

Уште еден монолит се појави на врвот на еден рид во Велс во март. Очевидци велат дека скулптурата изгледала совршено исправено. Засега не е познато кој ги поставува овие необични предмети.

ФОТО: Мистериозен монолит се појави во пустината Невада