Американец освои неверојатни 1,6 милијарди долари на игра на среќа во Флорида
Вториот по големина добитник на лотарија во историјата на САД ја подигнал наградата од 1,6 милијарди долари, но идентитетот на лицето може да остане тајна уште 90 дена, соопшти Лотаријата на Флорида, а пренесе „Ројтерс“.
Големата премија во играта на среќа „Mega Millions“ била подигната во понеделникот, седум недели по извлекувањето на 8 август, се вели во соопштението на Лотаријата на Флорида.
Флорида е една од 45-те сојузни држави, плус Вашингтон и Американските Девствени Острови, кои учествуваат во играта „Mega Millions“.
Извлекувањето на оваа игра на среќа се емитувало 31 пат, двапати неделно, без победник на крајот од емисијата. Среќата да ги погоди сите шест добитни бројки ја имал еден купувач на лоз во супермаркет во Нептун Бич, на 24 километри од Џексонвил.
Од „Mega Millions“ велат дека оваа премија е најголемата во нивната историја, а на второ место во историјата на игрите на среќа во САД.
Најголемата премија во САД изнесувала нешто повеќе од 2 милијарди долари, во рамки на играта на среќа „Powerball, за добитен лоз продаден во Калифорнија во ноември 2022 година.
Среќниот добитник ќе има можност да го побара целиот износ платен во 30-годишен ануитет или да земе паушален износ од 794,2 милиони долари во готовина.
Според законот на Флорида, добитниците на награди од 250.000 долари или повеќе, не мора јавно да го откријат својот идентитет до 90 дена откако ќе ја подигнат наградата.
За билет од 2 долари, шансите да се добие џекпот се околу 1 на 300 милиони.