Војската на САД синоќа без да ги извести Авганистанците, ја напушти базата во Баграм, која претставува клучно место во Авганистан, пренесува Би-Би-Си.

Генералот на авганистанската војска, Асадула Кохистани изјави дека војската на Соединетите Држави го напуштиле Баграм во 3 часот по полноќ. Во базата на Баграм постои и затвор, каде што наводно се наоѓаат околу 5 илјади талибански затвореници, кои по заминувањето на американската војска, сѐ уште се во кругот на базата.

Талибанците многу бргу напредуваат во Авганистан откако војската на САД почна да се повлекува од земјата. Генералот Кохистани во понеделникот изјави дека авганистанската војска очекува напади од талибанците во Баграм.

„Како што знаете, ако се споредиме со Американците, има голема разлика. Но според нашите можности, ние се обидуваме да дадеме сѐ од себе за да можеме да ја задржиме безбедноста на сите луѓе“ изјави Кохистани.

Прашан за синоќешното ненајавено напуштање на Баграм, американскиот воен портпарол, Сони Легет, се повика на изјавата од минатата недела, кога рече дека војските на САД го координираат своето заминување од многуте бази во Авганистан.

Базата во Баграм има многубурна историја. Таа најпрвин беше изградена од страна на САД за Авганистанците, во 1950-тите, а потоа падна под контрола на Советскиот Сојуз, по нападот на Црвената армија во 1979 година. Потоа беше окупирана од страна на Авганистанците поддржани од Москва, пред да падне во рацете на талибанците во ’90-тите години. Со доаѓањето на Американците во 2001 година, тие ја презедоа контролата над базата.

Со напуштањето на базата од страна на Соединетите Држави, сега е прашање колку Авганистанците можат да ја задржат контролата врз Баграм, поради сѐ поголемиот притисок што го вршат талибанците.

ВИДЕО: Американската војска по две децинии го напушта Авганистан