На отворањето на новата концертна сезона „Дамар на слободата“ на Филхармонија ќе биде промовирано и новото це-де „Филхармонија во срцето“, кое го издаде „Con:tempo“ во соработка со Филхармонија на РСМ.

Албумот е снимка од истоимениот концерт на Камерниот оркестар на Филхармонија, кој го водеше диригентката Дијана Имери Илкоска, а како солисти настапија Елена Дојчинова (флејта) и Владимир Лазаревски (обоа). На албумот може да се слушне изведбата на дела од Антон Аренски, Антонин Дворжак и од македонскиот композитор Томислав Зографски.

– Исклучително сум среќна што токму овој концерт се најде на це-дето, бидејќи станува збор за изведба во живо – вели Дијана Имери Илкоска, диригентката која во водеше концертот „Филхармонија во срцето“.

Дијана Имери Илкоска е една од најреномираните македонски диригенти, а во својата досегашна кариера бележи бројни настапи во земјата и странство. Соработува со оркестри како Филхармонија на РСМ, НОБ, Дубровачкиот симфониски оркестар, Симфонискиот оркестар и хор на БНР и бројни камерни состави. Во нејзините изведби покажува раскошен музички талент и префинетост, како и редок уметнички сензибилитет и израз.

Флејтистката Елена Дојчинова и обоистот Владимир Лазаревски се реномирани македонски уметници и членови на Филхармонија. На новото издание можеме да ги слушнеме во „Класична суита“ за флејта, обоа и камерен гудачки оркестар од еден од најистакнатите македонски композитори Томислав Зографски.

Новата сезона на Филхармонија ќе биде отворена на 6 октомври, во 20 часот, со концертот насловен „Зорнина“. На програмата се дела од генијалниот Волгфанг Амадеус Моцарт – три клавирски концерти и увертирата од операта „Свадбата на Фигаро“. Диригент е маестро Гудни А. Емилсон од Исланд. Мото на сезоната е „Дамар на слободата“.