2024 година беше најтоплата година досега, изјави портпаролот на Светската метеоролошка организација (СМО) пред објавувањето на сеопфатниот извештај кој ги вклучува наодите на различни регионални институти за следење на климата.

Извештајот кој се очекува да биде објавен во 17:00 часот по локално време во Женева ќе ги спореди наодите од метеоролошките опсерватории во Велика Британија, Кина, ЕУ и САД, изјави портпаролката Клер Нулис.

„СМО подоцна ќе потврди дека 2024 година била најтоплата година досега“, рече таа на прес-конференција во Женева.

„Видовме невообичаени температури на површината на копното и морето, невообичаена топлина на океаните, придружени со многу екстремни временски настани кои зафатија многу земји во светот, уништувајќи животи, средства за живот, надежи и соништа“, додаде таа.