Жената која падна од зграда во Охрид била турната, на две лица ќе им се суди за обид за убиство
За инцидентот кој се случи на осми март во Охрид кога жена беше тешко повредена при пад од трет кат од станбена зграда, СВР Охрид поднесе кривична пријава против две лица, 32-годишниот А.Д. и 21-годишниот Е.М двајцата од Охрид.
Кривичната пријава за А.Д. е за постоење основи на сомнение за сторено кривично дело „убиство во обид“ додека против 21-годишниот Е.М. од Охрид, поради постоење основи на сомнение за сторено кривично дело „помагање“.
„На 08.03.2024 околу 11.30 часот, првопријавениот, во стан на улицата „ Карпош Војвода“ во Охрид, сопственост на второпријавениот, по претходна расправија ја турнал М.О.(39) од Скопје од терасата. Таа била пренесена во болницата „Св.Еразмо“ во Охрид каде и биле констатирани тешки телесни повреди. Второпријавениот Е.М., кој бил присутен, не го спречил сторителот во извршувањето на кривичното дело“, информира портпаролот на СВР Охрид, Стефан Димоски.