Земјотрес со јачина од 6,1 степени по Рихтеровата скала го погоди јужниот дел на Филипините во неделата, соопшти Американскиот геолошки завод (USGS), една недела откако два смртоносни земјотреси го погодија архипелагот во Југоисточна Азија, пренесува Си-ен-ен.

Нема веднаш извештаи за штети или жртви, соопштија службите за итни случаи.

Земјотресот се случил на длабочина од 69 километри, само 100 метри од општината Дапа, во јужната покраина Суригао дел Норте.

„Почувствувавме силен земјотрес, но беше многу краток“, изјави за АФП спасувачот Ралф Кадалена.

Пред една недела, два силни земјотреси – со јачина од 7,4 и 6,7 степени по Рихтер, го погодија островот Минданао. Властите соопштија дека најмалку осум лица загинале.

Уште еден силен земјотрес, со јачина од 6,9 степени, го погоди островот Себу кон крајот на септември, при што загинаа 75 лица и беа уништени околу 72.000 згради.

На Филипините, сеизмичката и вулканската активност се интензивни поради нивната географска локација на таканаречениот Пацифички огнен прстен.