Замрзна Осломејско езеро, засега без опасност за рибниот фонд
Екстремно ниските температури кои во кичевскиот регион се спуштаат и до минус 15 степени, придонесоа да замрзне Осломејското езеро.
Препорачано
Од спортското риболовно друштво (СРД) „Хантер фиш” сметаат дека рибниот фонд не е загрозен зашто дебелината на мразот не е голема, а и езерото е длабоко.
Според претседателот на Друштвото, Бесмир Елези, очекувано било дека езерото ќе замрзне.
-Беше за очекување поради екстремно ниските температури да замрзне Осломејското езеро. Дебелината на мразот е неколку сантиметри и ако наредните денови се остварат прогнозите на метеоролозите, за очекување е температурите да пораснат што ќе овозможи мразот да се стопи, вели Елези.
Тој е оптимист и посочи дека мразот и да остане подолг период на езерската површина, опасност за рибниот фонд во езерото не постои.
-Бидејќи Осломејското езеро е со длабочина од над 40 метри, тоа овозможува рибниот фонд да биде безбеден. Исто така, големото количество вода и делумното замрзнување, овозможуваат езерото константно да има доволно кислород што придонесува рибниот фонд да биде во добра здравствена состојба. Но, јас очекувам претстојните денови замрзнатата површина полека да се стопи и езерото наскоро да биде без мраз а, рибите да егзистираат без никаков ризик, додава Елези.
