Дали некогаш сте слушнале за играта ласер таг? Знаете ли како се игра? Кои се всушност правилата во ласер тагот? А дали знаете дека оваа активност од неодамна е достапна и токму тука во главниот град?

„Сабвеј Арената“ за ласер таг, е култно место во Скопје, познато како место кое е собиралиште на авантуристи и луѓе со ведар дух, секогаш спремни за забави и испробување нови искуства. Новата епизода на „Забавна зона“, ќе ја посветиме токму на оваа активност – ласер тагот и неговата магија. Наш соговорник во оваа емисија беше Бисера Митреска која е правен застапник на „Сабвеј Арена“.

Ласер таг арената е извор на забава, простор кој зрачи со позитивна енергија и место на кое секој што дошол еднаш, се враќа пак. Во разговорот со Митреска, откривме како дошле до идејата да се отвори ваков простор за забава во Скопје.

– „Сабвеј Арена“ е првата метростаница во Скопје. Идејата за создавање на ова место беше да се создаде едно ново забавно катче во Скопје, каде што децата и повозрасната клиентела ќе можат да влезат во филмот, кинематографијата, фантазијата и да си поминат квалитетно и забавно време – вели таа.

Станува збор за место кое постои една и пол година, кое зрачи во ретро стил, инспирирано од голем број култни македонски и странски филмови и серии, а самото тоа може да се забележи и во салата преку фразите испишани на скривалиштата и ѕидовите. Како нова игра, која можеби не им е позната на сите Митреска ни објасни како всушност се игра ласер таг.

– Ласер таг е спортско рекреативна активност која се игра со специјализирана опрема за ласер таг, каде играчите може да се натпреваруваат на индивидуално и тимско ниво. Опремата е специјализирана со посебен вид на светлина и сензори, а целта е секој натпреварувач да добие повеќе поени, коишто се добиваат со точно погодување на сензорите на противникот- вели Митреска.

Во „Сабвеј Арена“, натпреварувачите имаат можност да играат со опрема од најдобриот и најпознатиот европски производител од оваа област, а со купувањето на оваа опрема Македонија сега е на светската мапа на ласер таг центри.

Опремата се состои од (појаси и пушки) на која се наоѓаат сензори во сина или црвена боја, а целта е преку специјализирани ласерски пушки да се погодат сензорите на противникот и на тој начин тимовите добиваат поени.

„Сабвеј арената“ е едно од најпопуларните места за прослава на детски родендени, а исто така може да им понуди и квалитетно време и забава на повозрасните, како и тим-билдинзи. Ја прашавме Митреска дали има органичување за возраста во однос на натпреварувачите.

– Горна граница на посетители немаме, сè додека сте млади во духот и сакате сè уште да ја доживувате фузијата на фантазијата, на филмот, забавата, спортот, добредојдени сте во „Сабвеј арена“. Додека пак минималната граница е 8 години, или 130 сантиметри висина. Тоа се одредени препозиции што ги налага производителот на опремата и коишто се потребни за да можете да ракувате соодветно со опремата – изјави правниот застапник на „Сабвеј арена“.

Нашиот соговрник Бисера, ни откри дека токму тука во „Сабвеј арената“ се одржуваат и мини натпревари на специјални денови.

– Минатата година, организиравме натпревар за празникот „Св. Трифун“, кој беше фузија од празниците „Св. Трифун“ и „Св. Валентин“, каде се натпреваруваа во парови, мажи против жени. Исто така имавме и натпревар за денот на жената, Осми март, каде припадничките на понежниот пол имаа гратис натпревари со друг вид на забава, за тоа да биде едно целосно доживување – сподели таа.

Интересно е тоа што нивни почести посетители се жените. Како и меѓу децата, така и меѓу возрасните.

– Можеби жените сакаат повеќе да се забавуваат и се со послободен ум во Македонија, но се надевам дека ќе се избалансираме. Иако досега во игрите, навистина женскиот пол остварува многу подобри резултати во овој тип на игра – изјави Митреска.