За подобро и поефикасно лекување на пациентите со ковид-19: Швајцарска донација на респиратори во прилепската болница

Прилепската болница доби швајцарска донација од 20 респиратори-вентилатори што се особено важни во лекувањето на ковид-пациентите, особено на оние со потешка клиничка слика. Донацијата е од Дејан Аџиоски, кој живее и работи во Швајцарија, и доаѓа како последицва на неговите блиски контакти со швајцарската фирма за медицинска опрема БЦД „Микротехник”.

– Ова е многу значајна донација за пациентите со потешка клиничка слика, а ќе се користи и по пандемијата, главно, на интерното одделение, вели директорот на прилепската градска болница „Борка Талески”, Драган Богојески.

 – Со овие респиратори ќе обезбедиме доволен внес на кислород и подобрување на сатурацијата на пациентите кои се лекуваат од ковид-19. Апаратите соодветно ќе се распределат на сите ковид-оддели за пациентите со потешка клиничка слика, изјави Богојески.

Прилепскиот градоначалник Илија Јованоски е благодарен на донацијата, која е прва во земјава од оваа швајцарска фирма. При денешната видео комуникација со соптвеникот на фирмата, Седрих Пахут и со нашинецот Аџиоски, се заблагодари на донацијата и се надева на идна соработка.

– Ова е големо добротворно дело за Прилеп и за граѓаните. Опремата ќе помогне на сите кои поминуваат со ковид-19, особено е битно зашто Прилеп е меѓу градовите со голем број случаи. Ова ќе го олесни лекувањето, рече Јованоски.

Видео на денот