ВИДЕО | Мицкоски: Историска победа на народот, време е ДУИ и СДСМ да одат во опозиција
Претседателот на ВМРО-ДПМНЕ, Христијан Мицкоски вечерва на прес-конференција порача дека ова е историска победа на народот, а ДУИ и СДСМ треба да одат во опозиција. Тој рече дека го памети секое ветување и со сите сили ќе се обиде да не го разочара народот.
– Историска победа на народот. Победи Македонија која е на Македонците, Албанците, Турците, Србите, на Власите, христијаните, муслиманите, атеистите, на гордиот народ. Падна владата, и има причина за тоа. Криминалот, корупцијата, одземената држава, тендерите, непотизмот, и уште 100 други последици кои направија државата да страда, а народот да е разочаран. Вечерва конечно се поразени, додаде тој.
Претседателот на ВМРО-ДПМНЕ вели дека се поразени предавствата и поделбите.
– Оние стотина луѓе од ДУИ и СДСМ кои мислеа дека се господари на нашите животи. Нив денеска ги боли главата, има и зошто. Ќе одговараат до последниот, секој кој направил криминал и спровел корупција. Мора да има одговорност која ќе се темели на правда и закони. Поразен е и бојкотот на ДУИ. Ова на нашата победа ѝ дава посебно задоволство. Народот покажа дека нема да дозволи поединци да создаваат кризи и преку институции да се штитат себе си. А ДУИ покажа дека се партија која најмалку се грижи за Македонија, и се им се удри во глава. Време е со СДСМ да одат во опозиција. Народот им одржа лекција и си ја врати државата. Македонија ќе има иднина која ќе се темели на вредност и надеж. Вечерва има причина за славје. Го паметам секое ветување, и ќе дадам последен атом од моите сили да се оствари и да не го разочараме народот. Вечерва се покажа дека нема Македонија на ДУИ, нема Македонија на СДСМ, ниту на ВМРО-ДПМНЕ, или која било политичка партија, има само една вечна, независна и слободна Македонија, порача Мицкоски.
На прашањето дали разговарал со албанската опозиција, Мицкоски изјави дека вечерва се слушнал со Биљал Касами кој ја честитал двојната победа, и потврди дека што поскоро ќе формираат коалиција.
За тоа дали ќе има и евентуална коалиција со ЗНАМ или Левица, тој посочи дека ќе разговараат со сите опозициски партнери, но не значи дека сите ќе бидат дел од Владата.
– Главниот и основен принцип е темелната вредност на едно општество – да се почитува граѓанинот, заклучи тој.
Најави дека ќе формираат влада во најкус можен рок и им порача на граѓаните во првите 100 дена да очекуваат многу добри вести за македонската економија.