Лидерот на ДУИ, Али Ахмети го прогласи Европскиот фронт за втора победничка политичка сила после ВМРО-ДПМНЕ, бидејќи на изборите, како што рече на вечерашната прес-конференција, практично се натпреварувале со ВМРО-ДПМНЕ.

Освен тоа, оцени дека се големи победници над албанската опозиција од која освои над 30.000 повеќе гласови.

– Според нашите пресметки кои не се конечни, имаме освоено 19 мандати, но до крајот на пребројувањето на гласовите можно е да добиеме уште еден пратенички мандат, изјави Ахмети.

Во обраќањето пред медиумите не изостана ни честитката до победниците.

– Им честитам на ВМРО-ДПМНЕ и на господинот Мицкоски за победата без разлика во какви околности тој ја искористил предноста за овие гласови. Сега не сакам да навлегувам во тоа и да анализирам, такви биле околностите. Сега секој со секого може да се сретне, меѓутоа единствен легален и легитимен претставник на Албанците, но и на Бошњаците, Турците, Ромите е Европскиот фронт кој е втора партија по поддршката од избирачите и по бројот на гласови на овие избори, рече Ахмети.

На новинарско прашање дали со големата победа на ВМРО-ДПМНЕ значи дека ДУИ оди во опозиција, Ахмети со одговор:

– Не знам дали добро ме слушнавте, но јас реков дека треба да имаме стабилност во државата.

Ахмети ги оцени изборите како фер и демократски и им се заблагодари на членството и на гласачите што ги поддржале.

– Ние ќе ги претставуваме не само тие што гласаа за нас туку и сите Албанци кои излегоа на овие избори, додаде Ахмети во седиштетот на партијата во Мала Речица.