ЈП „Водовод и канализација“-Скопје во врска со прекинот на водоснабдувањето на Детската болница „Козле“, попладнево соопшти дека при увидот кој го извршиле неговите работници, тие констатирале дека причината за прекинот не е во нивна надлежност и дека станува збор за дефект кој е во сопственост на болницата.

„ЈП „Водовод и канализација“-Скопје ја информира јавноста дека наши екипи извршија комплетен увид на терен и констатираа дека причина за прекинот не е во наша надлежност. Односно, станува збор за дефект на водоводната инсталација која е во сопственост на болницата. За наведеното, известени се надлежните во болницата и тие треба да го санираат дефектот на внатрешната водоводна инсталација“, велат од јавното претпријатие.

Оттаму уште велат и дека и покрај нивните апели, во текот на увидот констатирале дека болницата „Козле“ „нерационално ја користи водата за пиење, со полевање на парковската површина во нејзиниот склоп“, а ова се случувало „додека се занемарени примарните работни активности на истата“. Јавното претпријатие до медиумите испрати и видеоснимка на која наводно се гледа нерационалното користење на водата во детската болница.

„Самото тоа укажува на фактот дека и покрај обвинувањата од раководството на болницата, ЈП „Водовод и канализација“-Скопје нема никаква вина поврзана со прекинот на водоснабдувањето и ги отфрла сите обвинувања. И покрај горе наведеното, ЈП „Водовод и канализација“-Скопје со оглед дека станува збор за сензитивна работа, излезе во пресрет и постави цистерна со питка вода пред самата болница. Во прилог видео за злоупотреба на водата за пиење и нерационално користење на истата“, пишува во соопштението од ЈП „Водовод и канализација“, напишано со прилично ниско ниво на писменост.

Град Скопје: Проблем не е водата, проблем се оние што ја добиваат џабе и институциите што ги штитат