Трагедија се случи денеска во скопската Зоолошка градина. На 44годишна возраст почина Ристе Трајковски, човекот кој се грижеше за жирафите во ЗОО и кој со својот невообичаен однос кон егзотичните животни беше инспирација за скопјани, но и за светски познати медиуми. Причината за смртта се уште е непозната.

За трагедијата да биде уште поголема, неколу часа потоа почина и последната жирафа во ЗОО Скопје, десетгодишната Флопи.

Вработените во Зоолошката градина денеска неколку часа се обидувале да ја спасат жирафата, но не успеале. За смртта на Флопи се очекува официјално соопштение од скопската Зоолошка градина.

Претходно од салмонела почина жирафата Каспер, потоа со силен отров беа отруени ретките пржевалски коњи, по што ЗОО Скопје го изгуби и статусот за кандидат во Европската асоцијација на зоолошки градини и аквариуми – ЕАЗА.