Во најтесен избор за наградата „Роман на годината“ влегоа пет романи
Романите „Единствен матичен број“ од Лидија Димковска („Три“), „Ако се родат некакви чувства: зборник за љубовта на Гоце и Јанка“ од Блаже Миневски („Матица македонска“), „Заборав“ од Томислав Османли („ВиГ Зеница“), „Сѐ уште можам нешто да сторам“од Фросина Пармаковска („Или – или“) и „Зелениот дворец“ од Сибо („Арс Либрис“) се петте прозни остварувања што се најдоа во најтесен избор за наградата „Роман на годината“ за 2023 година, што ја доделува Фондацијата за унапредување и промоција на културните вредности „Славко Јаневски“.
Одлуката ја донесе комисијата во состав: Влада Урошевиќ (претседател и минатогодишен лауреат), Бранко Цветкоски, Марија Ѓорѓиева, Сашо Огненовски и Катерина Богоева (претставник на Фондацијата).
Наградата, чиј генерален покровител е „Комерцијална банка“ АД Скопје и која е поддржана од Министерството за култура на Република Северна Македонија, годинава се доделува по јубилеен 25-ти пат. Таа се состои од плакета, оригинална статуетка и паричен износ од 150.000 денари.
Досегашни добитници на наградата „Роман на годината“ се:
2022 – Влада Урошевиќ, „Вистинита но не многу веројатна историја за семејството Пустополски за куќата покрај Вардар и за четирите прстени“;
2021 – Симона Јованоска, „Денот на црвот“;
2020 – Владимир Јанковски, „Скриени желби, немирни патувања“;
2019 – Оливера Николова, „Песот со тажен поглед“;
2018 – Николина Андова-Шопова, „Некој бил тука“;
2017 – Фросина Пармаковска, „Одбројување“;
2016 – Давор Стојановски, „Собирачи на пепел“;
2015 – Петар Андоновски, „Телото во кое треба да се живее“;
2014 – Луан Старова, „Балканвавилонци“;
2013 – Владимир Плавевски, „Јадица“;
2012 – Митко Маџунков, „Птиците од ланските гнезда“;
2011 – Снежана Младеновска Анѓелков, „Единаесет жени“;
2010 – Душко Родев, „Човекот што ги сакаше калинките“;
2009 – Томислав Османли, „Дваесет и првиот“;
2008 – Јагода Михајловска, „Индиго Бомбај“;
2007 – Блаже Миневски, „Нишан“;
2006 – Кица Колбе, „Снегот во Казабланка“;
2005 – Пајо Авировиќ, „Џахиз и истребувачите на кучиња“;
2004 – Оливера Николова, „Куклите на Росица“;
2003 – Милован Стефановски, „Изгубен жегол“;
2002 – Гоце Смилевски, „Разговор со Спиноза“;
2001 – Димитар Башевски, „Бунар“;
2000 – Венко Андоновски, „Папокот на светот“;
1999 – Слободан Мицковиќ, „Куќата на Мазарена“.
Комисијата ќе го соопшти името на лауреатот на оваа престижна награда за 2023 година на прес-конференција што ќе се одржи во петок, 15 март, во кафе-книжарницата „Буква“ во Скопје, со почеток во 12 часот.