Деновиве започнаа активности за изградба на нови парк во населбата Мичурин.

Урбаниот парк ќе се гради на постојното игралиште спроти ОУ „Блаже Конески“, а ќе биде со површина од 3 573 квадратни метри. Паркот ќе понуди зелени површини, детско игралиште, пешачки патеки со клупи, комбинирано спортско игралиште за рекреација, како и место за друштвени игри за најмладите.

Исто така, на оваа локација ќе има и артериски бунар со цел навремено наводнување на околното зеленило.

Општина Аеродром, покрај овој парк, најавува изградба и на повеќе паркови на различни локации. Два од урбаните паркови ќе бидат во Стар Аеродром, покрај улиците „Методија Шаторов Шарло“ и „Пандил Шишков“, а нов парк ќе се гради и меѓу булеварот „Трета македонска бригада“ и касарната „Гоце Делчев“.