Тројца припадници на израелската армија (ИДФ) беа убиени, а нивниот офицер беше сериозно ранет во експлозија на тенк на северот од Појасот Газа, објавија денес израелските медиуми.

По првичните проценки дека тенкот бил погоден од граната од рачен фрлач на Хамас, ИДФ сè повеќе верува дека смртоносната експлозија е предизвикана од неисправна граната што се самодетонирала во тенкот, објавува „Тајмс оф Израел“.

Истражителите сега се обидуваат да утврдат точно што ја предизвикало смртоносната експлозија, која се случила во услови на тековните борби со Хамас на северот од окупираната палестинска енклава.

Израелските одбранбени сили соопштија дека загинатите  војници се со старост од 19 и 20 години а ранетиот офицер, чие име не е објавено, е хоспитализиран во тешка состојба.