Во борбата против корупцијата имаме напредок, но не е доволен, оценува Пендаровски
Во земјава има неспорен напредок во борбата против корупцијата ако се гледа извештајот на Транспаренси интернешенел, но тој не е доволен, вели претседателот Стево Пендаровски.
Во изјава за медиумите по обраќањето на тркалезната маса на Советот на амбасадори „Западниот Балкан помеѓу Западот и Истокот: Северна Македонија – членка на ЕУ до 2030 година“ потсети дека според извештајот имаме скок од 24 места што не е за потценување но далеку сме од европскиот процес.
-Имаме скок од 24 места на таа табела што не е мала работа. Но, како што кажав и во годишното обраќање во Собранието, тоа не е доволно затоа што и на таа позиција на која сме, на 87-мо место од 180 држави во светот кои се анализирани и мерени, ние сме сепак далеку од европскиот просек и тоа треба да ни биде целта. Значи, напредок имаме, меѓутоа не е доволен – рече Пендаровски.
Тој во контекст на напредокот во борбата против корупцијата не го коментираше вчерашниот став на Судскиот совет за Апелацискиот суд и чувањето во фиока на предмети во кои обвинет е и Сашо Мијалков и кусо одговори дека „не го негира она што го кажува Судскиот совет“.