Во „Аудиокултура“ ќе се одржи промоцијата на вториот роман на Тина Иванова
Новиот роман на Тина Иванова под наслов „Се чини сѐ уште постои љубов или: Љубов во време на корона“ е приказна за љубовта помеѓу еден маж и една жена.
Од една страна, зборува за љубовта помеѓу Ана и Дениал, љубов помеѓу христијанка и муслиман, за онаа чиста, искрена, невина љубов, речиси нереална – опишувана во некој класичен роман.
Од друга страна, пак, приказната третира уште една верзија на љубов или „нељубов“, како контрапункт на среќната, полетната, безграничната, безусловната, полна со радост, а тоа е онаа грдата, измамничката, полна со сомнежи, непочитување, тага. Локацијата е Скопје, градот кој дише во наративот како едно соединение со ликовите.
Но, во суштина, книгата зборува за предрасудите, пред сè, за религиските, а со тоа и за социјалните судови, за неразумните однесувања и за искривеностите во верувањата, наметнати од религиските авторитети помеѓу луѓето, кои се провлекуваат низ одредени дијалози и размислувања на главниот лик Ана.
Промоцијата на романот ќе се одржи на 16 декември, со почеток во 19 часот, во „Аудиокултура“. Промотор на книгата ќе биде новинарот, писател и активист за човекови права, Џабир Дерала. Промоцијата ќе биде збогатена со настап на двајцата извонредни пијанисти Дино Имери и Дуња Иванова.
Тина Иванова е авторка на повеќе книжевни дела, за кои е добитничка на неколку значајни награди. „Се чини сѐ уште постои љубов или: Љубов во време на корона“ е нејзин втор роман.