ВМРО-ДПМНЕ вели дека нема ништо спорно кај Мицкоски: „Лицето кое се спомнува никогаш не било во работен однос во партијата“
„Со новите кривични пријави на органите на прогон излезе на површина и виделина дека и вака оркестрираното обвинителство не можеше да најде ништо спорно кај лидерот на ВМРО ДПМНЕ Христијан Мицкоски, наспроти невистините диригирани од центрите под контрола на СДС“, соопшти вечерва ВМРО-ДПМНЕ, откако беше објавена информација дека повеќето уапсени денеска во рамки на истрагата околу спорната продажба на плацови во Делчево биле членови на партијата, а меѓу нив наводно бил и член на обезбедувањето на Мицкоски.
Еве го во целост соопштението од ВМРО-ДПМНЕ:
„Да потсетиме, СДСМ е партија која е осуден за клевета и лажни вести.
СДСМ според пресудата на Основниот суд треба да му се извини на Претседателот Мицкоски за тоа што шири лажни вести и невистини.
Доколку имаше и најмал сомнеж, партиските обвинители и инспектори кои работат исклучиво по нарачка на СДС ќе направеа голем скандал од случајот. Наспроти тоа се докажа дека со месеци наназад центрите на СДСМ ја лажеа јавноста за што не е прв пат, исто како што нема да биде прв пат потребата да се извинуваат поради тоа.
Посоченото лице во случајот никогаш немал работен однос во ВМРО ДПМНЕ, а сѐ друго преставува фабрикувана и злонамерна лага од СДСМ да се одвлече вниманието од инфлацијата, поскапените производи, сиромаштијата, неуспесите на владата.
За разлика од СДСМ јасно кажуваме дека секој кој се огрешил прес законот треба да одговара низ законита и транспарентна постапка“, велат од партијата.