Владата глува на апелите за изработка на Закон за вонредна состојба
Постои итна потреба да се донесе Закон за вонредна состојба, порача универзитетскиот професор Марјан Ѓуровски, додавајќи дека периодов треба да се искористи и да се консултираат експертите, затоа што со вонредната состојба на површина излегле голем број недефинирани елементи, а носители на законското решение да бидат министерствата за одбрана и за внатрешни работи.
– Жалам што покрај МВР и Кабинетот на претседателот на државата, Владата не покажа интерес за препораките на Факултетот за безбедност, вели Ѓуровски.
Министерот за правда, Бојан Маричиќ, неодамна најави дека ќе се подготвува Закон за вонредна состојба, но според информациите, деталите најрано би биле познати наредната година, а во меѓувреме се формира работна група што ќе го подготвува текстот.
Претходно, професори од Факултетот за безбедност апелираа со новиот Закон за вонредна состојба да се прецизира постапката за донесување на уредби со законска сила кои ги донесува Владата, како и да се предвиди посебна норматива за меѓународна соработка во услови на вонредна состојба, која ќе ја регулира меѓународната соработка која државата ја остварува во услови на вонредна состојба, особено од аспект на меѓународната помош и поддршка и координиран одговор на криза или вонредна состојба.