Се зголемува ли бројот на кардиолошки пациенти во државата? Колкава е смртноста? Има ли доволно термини за преглед? Дали септември е пикот кога има најмногу закажани кардиолошки пациенти и се вградуваат најмногу стентови? Утрово во емисијата „Слободен печат“ одговор побаравме од доктор Владимир Ристовски, специјалист интернист, супспецијалист кардиолог од Градската општа болница, „8 септември“.

Доктор Ристовски потврдува дека септември е вообичаен месец кога во нивните амбуланти има зголемен број на пациенти бидејќи е прв месец по годишните одмори.

– Бројката во амбулантите е значително зголемена. Се зголемува и во следните месеци, а зголемен е и бројот на инфаркти. Дневно се прегледуваат повеќе од 150 пациенти само во нашите амбуланти каде што имаме и секундарни прегледи како коронарен стрес, кардиолошки прегледи, ехокардиографијата, па тие бројки се значително поголеми. Инаку, покрај месец септември, голем број на инфаркти има и по новогодишните празници. Луѓето се опуштаат со голема колилина храна и алхохол, а сите тие се ризик-фактори коишто приденесуваат да имаме полни раце работа – вели Ристовски.

Тој објаснува дека главен ризик-фактор е стресот, но и цигарите и несоодветната физичка активност.

– Последните години тоа особено се забележува кај земјите со низок социоекономски статус, како што е и нашата држава, стресот многу влијае на зголемен број на кардиоваскаларни болести. Тука е и зголемената вредност на маснотиите, покачениот крвен притисок. Општо познато е дека еднаш годишно кај помладата популација треба да се направи проверка на крвта, а кај повозрастните на 6 месеци. Треба да се направи коронарен стрес и ехокардиографија како превентива – вели докторот.

Тој објаснува дека жените во однос на мажите се позаштитени. Најмладите пациенти се на 25-30-годишна возраст.

– Границата на инфаркти е намалена, сега сè повеќе млади пациенти доаѓаат во нашите амбуланти. Во нашата установа, најмлад пациент кој е стентиран е околу 25-26-годишна возраст. Најстариот пак е на 90 години. Има многу прегледи и мислам дека не можеме да постигнеме, бидејќи има недостиг на високообразован и среднообразован медицински персонал, за да се прифати целокупното население. Секој лекар еднаш неделно има термин за амбуланта, каде што прави повеќе од 25-30 прегледи – вели Ристовски.

И во светски рамки расте бројот на кардиоваскуларни болести, објаснува докторот. Глобално, околу 17 милиони пациенти умират од кардиоваскуларни болести годишно.