Ист датум, два празника: Св. Валентин – Денот на вљубените и Св. Трифун – едниот со подолга традиција на овие простори, другиот „увезен“.

„Слободен печат“ ги праша скопјани што ќе празнуваат денес – нашиот традиционален празник со вино и закројување на лозјата, или Денот на вљубените со подароци, чоколади и љубов.

Дел од граѓаните велат дека ќе го слават Св. Трифун, бидејќи е традиционален, но не ги исклучуваат ни романтичните моменти на Св. Валентин:

„И тоа и тоа. Денот на лозарите и Денот на вљубените“, објаснува еден анкетиран.

Еден млад човек вели дека не верува во Валентин:

„Не верувам во Валентин. Реалниот празник што треба да го славиме е Св. Трифун.“

Еден господин додава за значењето на Св. Трифун:

„Св. Трифун е кога лозјата се закројуваат, за да има род, за да има вино, за да бидеме радосни и весели.“

Дел од граѓаните би го славеле празникот дома, со најблиските. Една госпоѓа ни објасни зошто не ги слави двата празници:

„А зошто да славам? Тоа што го славиш, треба да го имаш.“

Друг анкетиран додава дека празникот треба да биде и симбол на внимание и љубов:

„Св. Трифун ќе славам, ама мислам дека е добро да се слави и за убав повод. Се трудам да немам потреба за купување на конкретен ден, туку да давам љубов и внимание секојдневно.“