Вечерва од 18 часот официјално започнува 17. издание на Европското ракометно првенство, кое ќе трае до 1 февруари, а домаќини се Данска, Шведска и Норвешка. Трите скандинавски земји во наредните недели ќе бидат центарот на ракометните случувања на Стариот Континент.

Македонија по 14-ти пат по ред ќе настапи на големо натпреварување – континуитет со кој ретко која европска репрезентација може да се пофали. Избраниците на селекторот Кирил Лазаров својот прв настап ќе го имаат утревечер од 20:30 часот против кодомаќинот Данска. Во групата Б се и селекциите на Португалија и на Романија, а натпреварите ќе се играат во Хернинг.

„Слободен печат“ излезе во центарот на градот за да ги праша граѓаните дали се информирани за Европското првенство и какви се нивните очекувања од македонската ракометна репрезентација.

Дел од анкетираните признаа дека не се доволно информирани за почетокот на првенството.

– Па, не многу сум информирана, немам време да следам – додава една граѓанка.
– Сабајле слушнав на вести дека почнува првенството. Ќе го следам натпреварот – вели една анкетиранa.

Кога станува збор за очекувањата од македонскиот тим, мислењата се поделени, но во најголем дел позитивни.

– Добри се, солидни дечки. Дали можат да ја победат Данска? Тешко прашање… ама не треба да бидеме песимисти. Можеби ќе изненадат – вели еден од анкетираните.

– Јас од срце навивам за Македонија. Колку сме спремни, не знам, ама секогаш ќе посакам победа. Ако дадат максимум на терен, не можеме да бидеме незадоволни – вели граѓанин.

Сепак, има и такви кои се пореални во процените.

– Тешко, тешко… кај може Македонија да ја победи Данска? Данска е голем залак за нас – вели анкетиран граѓанин.
– Мислам дека имаме шанса да се покажеме – вели еден од анкетираните.