Светскиот ден на планетата Земја се одбележува на 22 април. На овој ден се одржале најголемите еколошки демонстрации во историјата, поради што овој ден е прифатен како Ден на планетата Земја на Конференцијата на Обединетите нации за животна средина во 1992 година во Рио де Жанеиро.

„Слободен печат“ ги праша граѓаните како се грижат за планетата Земја, колку често засадуваат дрвја и дали рециклираат или реупотребуваат предмети?

Речиси сите анкетирани одговорија дека би можеле повеќе и поактивно да се грижат за планетата Земја, внимавајќи на рециклирање на амбалажи, реупотребување на предмети, штедење вода и електрична енергија и слично.

-Навистина мислам дека можам повеќе да се грижам за планетата Земја, но сега засега пробувам никогаш да не фрлам ѓубре наоколу на земјата и би сакала малку да намалам со возење автомобил – рече една млада девојка.

На прашањето дали во последнава година засадиле дрво или семе, речиси сите анкетирани одговорија позитивно, со тоа што, дел од нив засадиле дрвја, а поголем дел цвеќиња во нивните дворови.

-Да, пред два дена имаше акција на засадување на дрвја во Куманово, така што учествував во таа акција – изјави еден студент.

Меѓу одговорите на студентите, за рециклирање на амбалажи и реупотребување на предмети граѓаните одговорија дека најчесто рециклираат пластични шишиња, користат метални цевки за пиење и најчесто реупотребуваат тегли.

– Многу реупотребувам тегли. Најчесто ги користам за да пренесувам храна и течности во нив, наместо во пластични садови – изјави еден од анкетираните.