ВИДЕО | Во натпревар со два промашени пенали Рома го победи Удинезе, десетина минути за Несторовски
Фудбалерите на Рома го совладаа Удинезе со 3:0 во рамките од 30-тото коло во италијанската Серија А на „Олимпико“.
Видовме три гола, но и по еден промашен пенал на двете страни. Екипата на Жозе Мурињо со овој триумф дојде до 56 бодови и чекори кон пласманот во Лигата на шампионите.
До водство Рома дојде во 37-та минута, кога Переира од Удинезе играше со рака во својот казнет простор. Кристанте од пеналот ја погоди стативата, но топката се одби до Едоардо Бове на кого не му беше тешко да погоди.
По десет минтуи игра во второто Рома ја зголеми предноста. По одличниот контранапад и проигрувањето од Белоти капитенот Лоренцо Пелегрини постигна гол и донесе нова радост на „Олимпико“.
Гостите имаа идеална прилика во 69-тата минута да го намалат водството, но Переира не ја реализираше најстрогата казна. Конечните 3:0 ги постави Абрахам во 91-та минута. Македонскиот напаѓач, Илија Несторовски шанса доби во 78-та минута кога влезе на местото на Ловриќ.