ВИДЕО| Во Лондон уапсени повеќе од 350 учесници на протестната група „Палестинска акција“
Повеќе од 350 лица беа уапсени денес во центарот на Лондон по протестот на поддржувачите на групата „Палестинска акција“, кои се собраа и покрај фактот дека оваа организација е забранета во Велика Британија, јавија британските медиуми.
Препорачано
Организаторите на протестот изјавија дека 700 лица се собрале на плоштадот пред британскиот парламент, објави „Скај њуз“.
Метрополитенската полиција на Лондон соопшти дека „значителен број учесници на митингот“ носеле транспаренти во поддршка на забранетата група „Палестинска акција“.
Полицијата во објава на мрежата X соопшти дека досега се уапсени повеќе од 50 лица и дека интервенцијата продолжува.
Тие додадоа дека ќе биде потребно време, но предупредија дека ќе уапсат секој што ќе изрази поддршка за „Палестинската акција“.
Одлуката за забрана на оваа група стапи на сила на 5 јули, а изразувањето поддршка за „Палестинска акција“ е кривично дело казниво со затвор до 14 години, потсетува „Скај“.
Организаторите на митингот претходно оваа недела објавија дека протестот ќе се одржи и покрај забраната, откако по забраната на групата беа одржани неколку слични демонстрации.
Досега, повеќе од 200 лица се уапсени поради активностите на нелегалната група Палестинска акција, а тројца се обвинети.
Џереми Шипам, Џудит Мари и Фиона Меклин се обвинети и ќе се појават пред Судот за прекршоци во Вестминстер на 16 септември.
Во исто време, денес во Лондон се одржува уште еден митинг организиран од посебна група, Палестинската коалиција, чии учесници започнаа од Расел Сквер.
Полицијата објави дека еден учесник на митингот е уапсен за носење транспарент во поддршка на групата Палестинска акција.
Портпаролот на Министерството за внатрешни работи претходно истакна дека забраната за Палестинска акција нема никаква врска со Палестина, ниту пак влијае на слободата на протест и барањето за палестински права.
„Забраната се однесува само на специфична и тесна организација чии активности не ги одразуваат ставовите или не ги претставуваат илјадниците луѓе низ целата земја кои продолжуваат да го остваруваат своето основно право на протест по разни прашања“, додаде портпаролот.
