Редакцијата на порталот „Инфомакс“ објави дека синоќа имало упад во нивното студио додека во живо се емитувал поткастот „Тешки муабети“.

Според објавата од порталот, инцидентот се случил во 23:45 часот.

„Лицето најпрво почна да навредува, да се заканува по живот за потоа да ја скрши вратата од дворот која е со шифра, а потоа да ја скрши и влезната врата од студиотo каде се обиде физички да се пресмета со присутните“, се вели во објавата од „Инфомакс“.

На нивниот портал може да се види и видеото во кое додека се емитува поткастот се слуша тропање, а по барање на водителот Александар Митовски емитувањето е прекинато. По кратко време тој повторно се враќа во емисија каде дава објаснување за упадот и вели дека лицето го задржале во студиото додека да дојде полиција. Митовски го опиша напаѓачот како „партиска будала“ и најави правна разрешница на случајот.

Повторно вклучување во живо на Митовски следеше по неколку часа, во кое тој информираше дека инцидентот е документиран, како и дека полицајците пристигнале за многу кратко време и веднаш преземале мерки за обезбедување на објектот и стабилизирање на ситуацијата.

Тој ја оцени полициската интервенција како професионална и навремена и рече дека случајот ќе продолжи да се обработува институционално.

„Очекуваме и сите колеги новинари и медиумски здруженија да се солидаризираат затоа што медиумите се основа на едно демократско општество“, порачаа од „Инфомакс“.

ВИДЕО | Упад во живо на Инфомакс, насилник влегол во студиото и почнал да крши и да ги навредува новинарите