Австралискиот атлетски бисер Гоут Гоут испиша нова страница во историјата, откако постави сензационален национален рекорд на 200 метри со време од 19,67 секунди, резултат што е подобар и од оној што го имаше легендарниот Усаин  Болт на иста возраст.

Осумнаесетгодишниот спринтер стана првиот Австралиец што успеал да ја пробие границата од 20 секунди, и тоа на националното првенство во Сиднеј.

Со овој подвиг, Гоут го надмина младинскиот резултат на Болт од 19,93 секунди поставен во 2004 година, а се доближи и на само две стотинки до светскиот јуниорски рекорд на Еријон Најтон од 2022 година.

Талентираниот атлетичар од Квинсленд притоа го подобри и сопствениот национален рекорд од 20,02 секунди, кој го постави при одбраната на титулата. Интересно е што и второпласираниот Ајдан Марфи ја урна старата граница, финиширајќи со 19,88 секунди.

Ова е само уште едно во низата извонредни достигнувања на младиот спринтер, кој веќе во 2024 година го собори 56 години стариот австралиски рекорд на Питер Норман со време од 20,04 секунди.