Пред Владата вечерва се одржува нов масовен протест организиран од опозицијата, на кој граѓани изразуваат назадоволство од таканаречениот „француски предлог“ за почеток на преговорите на Македонија за членство во ЕУ и бараат оставка од владата на Димитар Ковачевски.

Протестот започна тензично, со фрлање јајца, тоалетна хартија и шишиња кон зградата на Владата, по што беше урната заштитната ограда, а имаше и туркање со полицијата.

Се слушаат извици „Оставка“ и „Станете Македонци“. Дел од демонстрантите се судрија со полицијата која постави кордон пред зВладата, откако ја пробија заштитната ограда и започнаа да фрлат по полицијата со камења. Дел од медиумите јавија дека во толпата се забележани и неколку луѓе со фантомки.

На почетокот на протестот, македонската химна ја изведе Ламбе Алабаковски, пејачот осомничен за потпалување на бугарскиот културен клуб во Битола.

„Ако мојата дијагноза е пироман, вашата дијагноза е предавничка, им порача денеска на властите Алабаковски, кој потоа симболично запали лист на кој беа испишани Преспанскиот договор, Договорот со Бугарија и францускиот предлог.

Лидерот на ВМРО-ДПМНЕ, Христијан Мицкоски, денеска ги повика граѓаните на голема масовност затоа што, според информациите на опозицијата, владата утре има намера да го прифати предлогот на француското претседателство.