Драги Ѓоргиев, таткото на тапанарот на групата ДНК, Ѓорги Ѓоргиев, кој трагично загина во пожарот во дискотеката „Пулс“ во Кочани, денеска преку објава на „Фејсбук“ се пожали дека постојано бил ограбуван гробот на неговиот син во Струмица. Како што посочи Ѓоргиев во објавата, во која сподели и видео од безбедносна камера, досега имало 14 кражби.

На видеото, како што може да се види, жена приоѓа до гробот, става во најлонска ќеса некои работи и си заминува.

„14 кражби на нашиот ангел, и ден-денес не го оставаат гробот на мојот син, не знам со какво срце и душа сè уште крадат од гробот. Да си ми здрава и жива тетке која и да си и да ти се здрави и живи децата“, напиша Драги Ѓоргиев на Фејсбук.

Во пожарот во „Пулс“, загинаа и пејачот на бендот ДНК Андреј Ѓорѓиески, придружниот вокал Сара Пројковска, која беше и професорка на Факултетот за музичка уметност, клавијатуристот Филип Стевановски, гитаристот Александар Коларов, официјалниот фотограф на групата, Александар Ефремов, тонецот на групата, Игор Велков, битбоксерот Мартин Атанасовски-Буцо. Пејачот на групата, Владимир Блажев-Панчо почина по неколкумесечна борба живот. Кобниот пожар однесе 63 жртви.

Таткото на загинатиот тапанар од ДНК ѝ остави 2.000 денари на власта на улица во Кочани, да дојдат да запалат свеќа