ВИДЕО | Татијана Јанакиева, јога учител: Да се најде мирот во ова немирно секојдневие е предизвик за сите
Во период на пандемија, војна која ја тресе Европа, како и секојдневни проблеми и стресови, се’ повеќе луѓе бараат начин да си го најдат мирот, да се опуштат и барем за миг да заборават на реалноста, но и да ги неутрализираат секојдневните тензии и стресови.
Јогата се препорачува како „мелем“ на умот и телото, таа има историски корени во древната хинду филозофија. Различни стилови на јога комбинираат физички пози, техники на дишење и медитација или релаксација.
На оваа тема за „Утрински печат“ разговаравме со Татијана Јанакиева, јога учител, кој говореше за благодетите што ги нуди јогата, но и како истата да ја примениме во нашето секојдневие.
– Јогата нуди многу благодети, пред се`, работи директно со нервниот систем, го зајакнува имунитетот, го зацврстува физичкото тело во зависност од интезитетот на праксата. Со само еден час применување на вежби и техники, јогата може да ни помогне во секојдневието. Најважно е дишењето, постојат неколку техники кои може да ги примениме во било кое време и на било кое место, а со кои за момент ќе се ослободиме од стресот и притисокот. Со основни кругови на главата, од лево кон десно и обратно, како и смирено дишење. Неопходен е фокус, длабоко вдишување и издишување преку нос, прво со воздух го полниме стомакот, па градите … а потоа издишуваме преку градите и стомакот, едноставни вежби кои гранатираат смирување на умот и телото. Кога ќе бидете под стрес, енергијата се блокира на едно место, па затоа е неопходно да го растресете вашето тело преку главата, рацете и нозете, рече Јанакиева.
Се’ поголем број на луѓе сакаат да живеат здраво, а ковид-19 само дополнително го има интензивирано интересот на грѓаните за јогата. Според Татијана, здравиот начин на живеење е предизвик за многу граѓани.
– Пандемијата ја поминав во Тајланд, на островот Ко Панган, место каде волонтирав еден месец во јога школа. Запознав голем број луѓе кои сакаат да го подобрат својот физички, ментален и интелектуален развој. Имаше рестрикции, но најголем дел од времето го поминав на плажа. Искуството да практикувате јога на море и пред таков пејзаж е неверојатно. За мене беше предизвик да практикувм јога на остров кој е препознатлив по големата влага, а инсектите околу мене беа дополнителен мотив да и во такви услови да пробам да се фокусирам, да се најдам себе си и да влезам кон самата себе, изјави таа.
Татијана Јанакиева е поранешнка манекенка, а денес професионален јога учител.
– Повеќе од седум години бев во светот на манекенството, почнав на 16 години, тоа беше преубаво искуство за мене, сепак, мислам дека го надраснав тој период. Да се биде модел и манекенка значи да се живее брзо и динамично, имав чести ангажмани и фотосесии кои траеја часови и часови. Динамиката денес ја смирив со јогата, го најдов мојот мир, сега работам на мојот психофизички прогрес во секојдневниот живот“, кажа јога учителот.
Јанакиева потенцира дека физичките и психичките придобивки од јогата се веднаш видливи, а вежбите гарантираат правилен раст и развој.
– Психичкиот развој е фасцинантен уште по првиот час … Балансот на нервниот систем е неопходен, па моите студенти за кратко време се чувствуваат релаксирано, тие излегуваат како „бебиња“, истакна Татијана.
Според Јанакиева, психата е душа, па јогата работи во подобрување на духовноста. Колку повеќе имате самопочит, толку повеќе ќе се сакате себеси, а колку повеќе имате љубов за себе, толку повеќе ќе сакате да имате редовна практика.