ВИДЕО| Спектакуларен огномет во Белград и другите градови, дронови го обоија небото со српското знаме
Целодневното одбележување на Денот на државноста заврши вечерва со огномет кој почна во исто време во градовите низ Србија и Република Српска. Почетокот на огнометот го означија дронови кои правејќи ја тробојка од знамето на Србија стигнаа до Белградската кула од Калемегдан.
Србија го слави Денот на државноста во спомен на два датума – 15 февруари 1804 година, кога Караѓорѓе го започнал првото српско востание и 1835 година, кога бил усвоен првиот Устав на кнежевството Србија – Сретењски.
Националниот празник, кој се слави од 2002 година, низ Србија беше одбележан со полагање венци, државни церемонии и академија.
Од централната церемонија во Орашац беше соопштено дека борбата за слобода на српскиот народ се уште трае.
За време на денешниот празник на различни настани беа претставени значајни историски личности и нивните дела. На пример, на неколку места во центарот на Белград беа прикажани холограми на оние кои оставија белег во науката и уметноста. Секој кој вечерва помина низ улицата Кнез Михаилова можеше да ги види и слушне најважните лични и работи и биографии од Никола Тесла, Сава Шумановиќ и Надежда Петровиќ.
Освен со централната државна церемонија во Орашац, Денот на државноста беше одбележан и со свечености во Опленац и Крагуевац.
Српскиот претседател Александар Вучиќ по повод националниот празник Ден на државноста одликува повеќе заслужни поединци и институции, а меѓу Македонците кои добија ордени се и почеснот конзул на Србија во Република Северна Македонија-Силјан Мицевски-постхумно, академик Влада Урошевиќ и оперскиот пејач Никола Китановски, јави дописникот на МИА од Белград.