Министерката за труд и социјална политика Јагода Шахпаска денеска потпиша Договор за грант со градоначалникот на општина Гостивар, Арбен Таравари , согласно проектот за изградба на нови, надградба или адаптација на постоечките објекти за згрижување и воспитување на деца на предучилишна возраст во општините.

Договорот за грант со општина Гостивар се однесува за доградба на објект со површина од 519 м2, со што заедно со постоечкиот објект на градинка би добиле една целина во вкупна површина од 1658 м2. Максималниот капацитет на оваа градинка во новопроектираниот објект е до 100 деца.

-Министерството за труд и социјална политика обезбеди 30 милиони денари за доградба на градинката „Детска радост“ објектот „Цветови“. Ова говори за нашата посветеност како Влада и како Министерство на она кое што претставува и програмска определба за зголемување на капацитетите за сместување на деца од претшколска возраст– истакна Шахпаска.

Таа го посочи како особено важен правилниот развој на децата во најраната возраст, за уште поуспешен понатамошен влез во образовниот систем и нивна изградба во квалитетни граѓани во нашето општество.

-Како дел од владината програма е и зголемувањето на процентот на опфат на деца во предучилишните установи на 60 отсто, односно дополнителни 7500 деца во градинките до крајот на мандатот- истакна министерката Шахпсака.

Таа додаде дека до крајот на годината планирано е отворање на нови седум градинки за прием на нови 460 деца во општините Ресен, Сарај,Куманово, Босилово, Брвеница, Лозово и Боговиње со единствена цел зголемување на опфатот на деца во предучилишното образование преку изградба, доградба и пренамена на објекти за згрижување на деца во предучилишна возраст.

Од страна на градоначалникот Таравари беше посочена одличната соработка со Министерството за труд и социјална политика , а за тоа говори фактот дека ова е петта градинка која се гради за изминатите 3 години. Тој додаде дека ако претходно имало по 350 деца на листа на чекање за прием во градинка, сега доколку не е пандемијата и Протоколот таа бројка би била целлосно пополнета .

Двете страни изразија подготвеност за понатамошна соработка во рамки на нивните ресорни надлежности.