Серија експлозии денеска попладнево одекнаа во зградата на државната безбедност во Тираспол во Приднестровје, одметнатата проруска територија во Молдавија, јавуваат медиумите.

Неколку часа откако руското Министерство за одбрана денеска објави дека една од целите е „да се воспостави копнен контакт со Приднестровје“, руско ориентираниот, отцепен регион на Молдавија на границата со Украина, молдавските власти известија за експлозии во Тираспол, главниот град на непризнаената република, позната и како Транснистрија.

„Во зградата на Министерството за државна безбедност во Тираспол се случија серија експлозии. Во близина има неколку амбулантни возила и гасовод“, се наведува во извештајот, пренесе руската државна агенција ТАСС.

Претставници на Министерството за внатрешни работи напишаа на Телеграм дека непознати напаѓачи пукале во зградата од рачни ракетни фрлачи.