Фудбалерите на Милан запишаа тесна, но исклучително значајна победа на гостувањето кај Верона (0-1) во рамки на 33. коло од Серија А, со што повторно се искачија на втората позиција на табелата.

Одлучувачкиот момент се случи во 41. минута, кога Адриен Рабио ја искористи асистенцијата од Рафаел Леао и го постигна единствениот погодок на натпреварот. „Росонерите“ имаа иницијатива и создадоа уште неколку изгледни шанси, но не успеаја да ја зголемат предноста.

И покрај тоа, трите бода од ова гостување се од голема важност во борбата за пласман во Лигата на шампионите. Милан сега има 66 бодови, колку и Наполи, а во наредното коло го очекува дерби пресметка против Јувентус.

Од друга страна, Верона продолжува да се соочува со сериозни проблеми – тимот е закован на дното на табелата, а во следното коло ќе се обиде да изненади против Лече пред своите навивачи.