ВИДЕО | Прекрасна глетка: Снежна покривка на Пониква, Попова Шапка и во Маврово
Како што прогнозираше и Славчо Попоски, утрово на сите повисоки планини во земјава имаше врнежи од снег, каде се формираше и снежна покривка.
Според видеокамерите на „Ski Macedonia“, јасно се гледа формирана снежна покривка и на најпознатите скијачки центри во нашата земја.
Имено, утрово има снег на туристичкиот центар Пониква, зимско-рекреативниот центар Попова Шапка, но и во преубавото Маврово.
Друштвото за угостителство и туризам Попова Шапка информира дека, сепак, оваа снежна покривка не е доволна за почеток на скијачката сезона.
– Имаме прва посериозна снежна покривка, но сè уште е рано да се прогнозира кога ќе почне скијачката сезона. Во изминатиот период отстранет е дефектот кој минатата година беше на жичарницата Церипашина и таа ќе може да се користи оваа сезона. Така, на располагање ќе бидат сите ски лифтови и жичарници се сервисирани и ремонтирани. Скијачките патеки се обновени и поставена сигнализација како и нивно обележување. За скијачите се изградени и два бачила за одмор каде ќе има кафе, чај и сендвичи. Тие се на патеките Поток 1 и Поток 2 и на патеката Ге, информира Живко Алексовски, раководител на Друштвото за угостителство и туризам Попова Шапка.
Скијањето на Попова Шапка оваа година ќе биде поскапо.
– Ски карти имаат зголемени цени затоа што и има глобално зголемување на цените на голем број влезни продукти за нашите услуги. Воедно годинава ќе се наплаќа и за користење на новиот шестосед чија употреба лани беше промотивна и бесплатна, информира Алексовски.
Според најавите доколку има доволно снег, скијачите ќе имаат прилика да го користат сите четири ски лифтови Поток 1 и Поток 2, Аеродром и ГЕ како и жичарниците Свети Илија, Церипашина и новата шестоседна жичница. Нивниот хотел Славија работи постојано, а другиот објект Попова Шапка ќе се активира со официјачниот почеток на ски-сезоната.