ВИДЕО | Пивоваров: Сѐ се гледа – преминувањето на границата на кобниот автобус е снимено, истрагата е во тек
Полека се расчистуваат околностите околу трагедијата со македонскиот автобус на автопатот „Струма“ во Бугарија и се елиминираат шпекулациите за самата несреќа. Меѓутоа, несреќата отвори многу други прашања за безбедноста и исправноста на работењето на транспортните компании.
-Ќе мора да се раздели законскиот дел за надлежностите на институциите. Член 49 за транспорт и врски ги разделува овие работи – царинските службеници се надлежни сите возила за меѓународен транспорт да поседува лиценца. Спроведена е истрагата во Царина и суспендирани се двајца цариници. Не е оправдување тоашто имало гужва на граница. Во издавањето интербус дозволи преку ИПА2 требаше да имаме интегриран компјутерски систем за сите возила, но средствата беа повлечени затоа што не беа искористени и беа пренаменети за лаборатории на крим-техника во МВР. Преку база на податоци веднаш ќе можеше да се знае дали е валиден документот на возилото, вели за Утрински брифинг Владимир Пивоваров, национален координатор за гранично управување.
-Не велам дека возилото имало фалсификуван документ или нешто такво. Сега сѐ е во сферата на шпекулации. Професионалноста треба да биде во преден план, а не рутината. Треба да се проверат патниците во автобусите, не по бројка туку по лични документи, додава Пивоваров.
По овој случај повторно се разгореа шпекулации за корупција.
-Кога ќе извадите лиценца за возило, влегувате во даночниот систем. Ако имате смешна цена за патување зарем не се прашувате како е тоа можно? Ако ви понудат ниска цена, нешто не е во ред. Оној кој работи легално поминува низ повеќе технички прегледи и има повеќе трошоци, вели Пивоваров.
Тој додава дека во вакви ситуации на немање документи, цариниците треба да го тргнат возилото на страна и инспекторатот изрекува казна. На црните превозници со комбиња им се одземаат возилата за да не го повторат прекршокот, но по две години судот им ги враќа и им се исплаќа отштета. Превозот на патници на црно е толку масовен што јавно се рекламираат на Фејсбук, коментира Пивоваров.
Но, се остава впечаток дека иако сѐ се знае и е очигледно, никој од надлежните не реагира и топката се префрла од институција на институција.
