ВИДЕО: Пелистер по продолжение го совлада словенечкиот Шенчур во АБА 2 лигата
Денеска во својот прв натпревар од турнирот во Суботица во АБА 2 лигата кошаркарите на битолски Пелистер со 82:78 по едно одиграно продолжение го совладаа Шенчур од Словенија.
Играчите на Дарко Радуловиќ беа подобар противник во најголем дел од мечот. Можеа да дојдат до победата и во регуларните 40 минути, но загубија двоцифрено водство во последната четвртина, иако имаа и напад за триумф.
Регуларниот дел заврши нерешено 69:69, а во дополнителните пет минути битолската екипа го имаше Александар Костоски.
Искусниот бек погоди кога беше најпотребно, ја постигна својата втора по ред тројка, вкупно четврта за него на средбата, доволно за недостижни 82:78, и прв успех за Пелистер во првата рунда.
Најефикасен стрелец кај Пелистер беше Андреј Маслинко со 22 поени (седум скокови), а расположен беше и Малком Бернард, кој постигна 21 поен, а додаде и осум скока и пет асистенции.