ВИДЕО | Моќта на смртта: Растат дрвја од ковчези на изложбата на Јоко Оно
Градот Каунас во Литванија е еден од годинашните европски престолнини на културата, заедно со Еш на Алзет во Луксембург и Нови Сад во Србија.
Свеченото отворање на „големата европска сцена“ во Каунас беше на 22 јануари годинава. Според планот, програмата ќе опфати околу 40 фестивали, повеќе од 60 изложби и 250 сценски настани и концерти на локални, но и на светски артисти и уметници.
Едно од оние светски имиња кои имаат своја изложба во Каунас е и Јоко Оно, вдовицата на славниот Џон Ленон. Нејзината изложба е именувана „Ex-It“ и претставува една навистина несекојдневна уметничка инсталација, објави „Ruptly“.
Имено, во зградата на една банка се поставени неколку дрвени ковчези од кои растат дрвја. Според Јоко Оно, дрвјата кои растат се симбол на непрестајноста на животот кој продолжува во различни форми. Иако оваа изложба била замислена уште во 1997 година и веќе неколку пати била претставена низ годините, Јоко Оно нагласува дека уметничката инсталација сега добива нова смисла и дека останува важна тема за време на пандемијата со коронавирусот.